كتير بنلاقي اختلافات في مجال صناعة السينما بالمنطقة العربية في تحديد الأسماء والتعريف الوظيفي لقسم الإنتاج. وده راجع لأسباب كتيرة، أهمها إن جزء من الشغلانة مرتبط بإسمها اللي وصلّنا بالإنجليزي. علشان كده قررنا نشاركم أقرب تصور عملي للمسميات الوظيفية, وده كان من خلال خبرتنا وبحثنا:
المنتج التنفيذي (Executive Producer): هو ممثل شركة الإنتاج أو صاحبها، وبيكون المشرف العام على الفيلم.
المنتج (Producer): هو المسؤول عن الفيلم بشكل كامل، سواء تم تعيينه من شركة الإنتاج أو كان منتج مستقل. دوره بيشمل الإشراف على كل مراحل الفيلم، بداية من التطوير، والبحث عن تمويل (في حالة المنتج المستقل)، لحد مرحلة ما بعد الإنتاج والتوزيع.
مساعد إنتاج (Assistant Producer): بيقوم بمساعدة المنتج في تفاصيل تحضير العمل السينمائي في كل مراحله.
المنتج الفني (Line Producer): هو الوسيط بين مدير الإنتاج والمنتج، ومهمته متابعة الشغل اليومي وتنفيذ الفيلم، مع التركيز على التفاصيل اللوجيستية.
مدير الإنتاج (Production Manager): هو المسؤول الأساسي عن تنفيذ الفيلم، وبيبدأ بشغل على الميزانية مع المنتج والمنتج الفني، لحد تأمين أماكن التصوير، والخدمات، والتعامل المباشر مع فريق العمل أثناء التصوير، وبيكون تحت إشراف المنتج الفني.
منفذين إنتاج (Runners): دول بيشتغلوا مع مدير الإنتاج في تنفيذ الفيلم سواء أثناء التصوير أو أيام التحضير.
كمان بدأنا نلاحظ وجود بعض المسميات الخاصة في قسم الإنتاج، زي:
Development Producer: المنتج المسؤول على تطوير الفيلم بالتعاون مع المنتج الأساسي ومع الكاتب أو المخرج.
Creative Producer: المسؤول عن تطوير الفيلم من الناحية الفنية، وبيشتغل على إيجاد طرق مختلفة لتمويل وتسويق الفيلم أو توزيعه.
تعليقات
إرسال تعليق