أهم 20 مصطلح هيقابلوك كسيناريست
1- السيناريو:
السيناريو هو الهيكل والإطار العام للفيلم، ليه تعريفات كتير، زي (الفيلم مكتوب على ورق) و (الوصف التفصيلي التسلسلي المكتوب لأحداث الفيلم) بس عموماً السيناريو هو نص درامي مكتوب بغرض التصوير.
2- الحوار:
أحياناً الجمهور بيخلط بين السيناريو و الحوار، بس انت ككاتب سيناريو لازم تكون عارف الفرق بينهم بوضوح، زي ماقولنا السيناريو هو خطة الفيلم، لكن الحوار هو أداة من أدوات الفيلم للتعبير، الحوار هو كل اللي بيتقال بين الممثلين وبعضهم داخل الفيلم، وبيكون ليه مواصفات خاصة زي إنه يقدم معلومات ويساعد في دفع الأحداث للأمام.
3- الفيلم الروائي الطويل:
هو فيلم يروي قصة سردية أو رواية من خلال مشاهد تمثيلية و مدته بتكون اكتر من 60 دقيقة.
4- الفيلم الوثائقي:
الفيلم الوثائقي أو التسجيلي هو فيلم بيصور أحداث ووقائع حقيقية مش مشاهد أو روايات خيالية، ومواضيعه بتكون مرتبطة بأشخاص أوأماكن أوظروف معينة.
5- الفيلم القصير:
الفيلم القصير نوع من الفيلم الروائي يتميز بقصر مدته، و الأوسكار بتعرف الفيلم القصير على إنه الفيلم اللي مدته أقل من 40 دقيقة.
6- المشهد:
المشهد هو أهم عنصر في السيناريو، لأن السيناريو بتكون من عدة مشاهد، والمشهد هو وحدة درامية بتغطي حدث معين بيحصل في زمان ومكان موحدين، ويمكن أن يتكون من لقطة واحدة أو عدة لقطات.
7- التيمة:
التيمة باختصار هي الفكرة اللي ورا الفيلم، اختصار قصتك في جملة واحدة، لما حد يسألك "الفيلم ده عن إيه" وترد بكلمة او جملة واحدة يبقى هي دي تيمة الفيلم.
8- الحبكة:
الحبكة هي سلسلة الأحداث المتصلة ببعض عشان تكوّن القصة، بمعنى إن كل حدث في السيناريو بتاعك بيكون ليه سبب و يؤدي لنتيجة، والحبكة هي اللي بتربط بين الأحداث دي.
9- الـ Logline: هو السطر اللي بتشرح فيه الفيلم بتاعك، وعادةً السطر ده بيكون واضح فيه بطلك الرئيسي و هدفه والخصم او الصرا عاللي بيقابله.
10- الـ synopsis:
هو ملخص الفيلم بيكون غالباُ صفحة واحدة بتلخص هدف البطل وصراعه وأهم الاحداث في الفيلم، وده بيكون ملخص أكبر من الـLogline و أقل من المعالجة.
11- المعالجة السينمائية:
المعالجة بتكون من 10 لـ 15 صفحة بتوضح فيهم الشخصيات الرئيسية اللي بيحصل بينهم الصراع الرئيسي للفيلم وبتكتب هتبدأ الفيلم إزاي، و بتحكي أهم الأحداث اللي بتحصل في كل فصل من الفصول الثلاثة للفيلم، وفي النهاية بتوضح نهاية الصراع اللي بتحصل في الفيلم.
12- الصراع:
يعتبر من أهم عناصر بناء الدراما في الفيلم، من غير صراع مش هيكون في فيلم، لأن الصراع بينشأ من وجود شخصيات ليها أهداف عكس بعض، والصراع ده ممكن يكون خارجي وممكن يكون داخلي.
13- الـ Backstory:
الخلفية الدرامية للأحداث او الـ Backstory هي مجموعة من الأحداث التي حصلت قبل القصة الرئيسية اللي بنشوفها في الفيلم، ويمكن الإشارة للخلفية الدرامية دي عن طريق شخصية أو عدة شخصيات أو عن طريق إظهارها بالفلاش باك، وممكن منستخدمهاش خالص في القصة الرئيسية لكن بتفضل شئ مهم بالنسبة للكاتب عشان بتساعده يعرف الشخصيات هتعمل إيه و هتتطور إزاي بناء عن الخلفية الدرامية اللي هو يعرفها عنهم.
14- نداء المغامرة:
من أهم الأجزاء في السيناريو بتاعك هو نداء المغامرة أو الحدث المفجر للاحداث وهي اللحظة اللي بتنبهنا و بتنبه البطل لوجود مشكلة أو معضلة ما أو ظرف معين بيهدد حياة البطل المستقرة وبتخلق التوتر و الصراع الرئيسي في القصة وبتخلي البطل لازم يدخل مغامرة جديدة أو عالم جديد و يتخلى عن استقرار حياته المعتاد.
15- الـ Planting and Payoff:
تكنيك مهم جداً في كتابة السيناريو معناه إنك بتزرع حاجة في الفصل الأول من الفيلم عشان تحصدها في الفصل الأخير من الفيلم، وده تكنيك بيستخدم عادةً عشان يبين التغيير اللي حصل للشخصيات أو التطور اللي حصل في القصة.
16- الـ Protagonist:
ده الوصف اللي بيطلق على البطل الرئيسي أو الشخصية الرئيسية في الفيلم.
17- الـ ِAntagonist:
ده الخصم الرئيسي في الفيلم، وممكن يكون شخص واحد أو منظمة أو عصابة.
18- الـ Anti-hero:
ده مش خصم ولا ضد البطل، ده بيكون نوع خاص من الأبطال، قد يكون شريرا أو خارجا عن القانون في نظر المجتمع، ولكن الجمهور يتعاطف معه.
19-حلقة الـ Pilot:
الحلقة الأولى من مسلسل أو برنامج اللي بتتكتب بغرض عرضها على المنتجين أو إذاعتها لمعرفة رد فعل الجمهور تجاه العمل.
تعليقات
إرسال تعليق