مونولوجات ومشاهد

مونولوجات ومشاهد 

 

(1)

بحبها

بحبها .. صدقنى .. والله بحبها .. وعمرى ما حبيت ولا هاحب غيرها .. وعشان بحبها سبتها .. سبتها تشوف نصيبها مع حد غيرى ..مانا شايفها اجمل شىء فى الوجود .. ارق مخلوقه ع وجه الارض ..

انا بعشقها .. لكن ظروفى اصعب مليون مرة من عشقي ليها .. وحظى نحس النحس .. يبقى ليه اظلمها معايا ليه اخلى سنيننها عذاب فى عذاب .. ليه اخليها تلعن حبي ليها .. واليوم اللى قابلتنى فيه .. وتلعن الحب ذاته .. عشان كده هضحى بحبى ليها وابعد عن طريقها .. وهاحاول .. يمكن انساها ..بس .. بس انا بحبها ومقدرش اعيش من غيرها .. والله بحبها وعمرى ما هاحب غيرها ..

................................

(2)

صابحه

انى مانيش عارف أبوها ده ماله .. ايه اللى جراله .. كل ما يشوفنى يلوى وشـه .. ويسبني ويمشى.. و كل ما اقوله ... سـلاموا عليكوا .... مايردش

 سـلاموا عليكوا يا ابه عبد الله : بردوا مايردش

من يوم ما قلتله انى عاوز اتجوز صابحة ... و هو اتغير ... اتغير خالص .....

دنى كنت بشتغل فى ارضه زى ما تكون ارضى .. احرت له الأرض .. و اسوق له الساقية .. و اجمع له الطماطم .. و انقى له الدود

و كان بيقولى " (يقلد صوته) " : " انى ماخلفتش رجاله يا رضا ... قام ربنا عوضنى بيك .. ده انت ابنى يا رضا " .

 " (يعود لصوته العادى) " من يوم ما رحتله عشان اخطب صابحه و هو اتغير .. اتغير خالص ... مين كان يصدق ان ابويا عبد الله يقولى الكلام ده .

انى يقولى ... جواز ايه يا وله .. جاك نيلة تاخدك ... انى ... انى يا ابه عبد الله

انى يقولى ... روح هاتلك جلابية الأول .. و لا البسلك برطوشة ....

مالها الجلابية دى ... و ايه اللى دخل البرطوشة فى الجواز .. ليه كده يا ابه عبد الله .. ليه تحرمنى من صابحة ... ده انى حتى بحب الكلب الأزعر اللى عندكوا ... ليه كده .. ليه تحرمنى منها يا ابه عبد الله ليه ....

ده احنا حتى متربيين سوا ... الدار جنب الدار ... و الغيط جنب الغيط ..

 " هاتلى جميز يا رضا ... انط على الجميزة و اجيبلها "

" هاتلى توت يا رضا ... اتشعلق على التوتة و اجيبلها "

" هاتلى سمك يا رضا ... اصطادلها سمك المصرف كلاته "

" مرجحنى يا رضا ... اربطلها حبل فى الجميزة و امرجحها " هيلا هوب هيلا هوب ........

ليه كده يا ابه عبد الله ؟ ليه تحبسها فى الدار و تحرج عليها تخرج منه .. دنى .. دنى اتعودت اشوف وشها الصبحية قبل ما اشوف السمس .. يا ابه عبد الله ليه ... ليه كده ... ليه كده يا ابه عبد الله .. ليه ..ليه

.................

 (3)

نهاية تفكير

انا حاسس اني من ساعة ما وعيت علي الدنيا.. والدنيا جيا عليا....؛

وكل ماعد افكر مع نفسي شويه في اللي حواليا احس اني ليا حق ومخاتهوش بس نفسي اعرف هو ايه....؛

لأ ولما بسرح بفكري شويه كمان احس اني انا الي فاشل .. دنا لا في دراسه نافع ولا في شغل نافع ولافي جواز نافع ولأ حتي في معاملتي مع اقرب ناس ليا...............؛

انا تعبت .......والله تعبت............"

لأ وكمان بحس ان الدنيا سودة حواليه واحس ان الناس والدنيا جيا عليا...

مبقتش عارف اعمل ايه.. ملقتش غير حل واحد................؟؟؟؟؟؟؟

هو انى اهرب لدنيا تانيه .. اه ..  انا صح.. الموت.. مفيش غيره

الموت هو الحل 

منا كده كده هموت.. استني ليه ............؟ استني ليه.. استني ليه

...................

(4)

خاينه

اخرسى خالص ...متدافعيش عن نفسك ...الناس كلها كانت بتحكيلى و انا مكنتش بصدق.. كنت بكدب نفسى ..ليه..ليه تعملى كده ...دانا حبيتك اكتر من نفسى ... مبخلتش عليكى باى حاجه.. فلوس ووضع اجتماعى .. انتى نسيتى انتى كنتى ايه...انتى كنتى و لا حاجه اوعى تكونى صدقتى نفسك انك هانم بجد..كل البهرجه واللبس و عيشه السرايات اللى انتى عايشاها دى من فلوسى انا اللى نضفتك و خليتك بنى ادمه ...

وفى الاخر تخونينى ..تخونينى ،انتى كنتى اغلى حاجه عندى ،كل حاجه فى حياتى لكن دلوقتى خلاص .. خلاص ،اطلعى بره ..بره

...........................

 (5)

ست البيت

يا اخى حس بيا بقى .. حس بيا .. انا برده بنى ادمه من لحم ودم .. عمرى ما قصرت معاك فى اى حاجة .. وطول عمرى بتمنى رضاك .. لكن انت حجر.. صخر .. بتدوس كل يوم على كرمتى لحد ما خلتنى كلبة تجرها وراك وهى ساكته بدون ما تعترض على اى حاجة

..ليه؟!.. لإن ده مش من حقها .. طبعاً ليك حق تعمل فيا اكتر من كده .. منا الجاريه اللى المفروض

تطبخ و تغسل وتكنس وتمسح .. بدون ماتقول تلت التلاته كام .. انا اتحكم عليا بالذل

عشان بنت مكسورة الجناح .. وانت طبعا سى سيد تشخط وتنتور ..تأمر وتنهى .. وانا اقول حاضر ..حاضر ..حاضر .. مش مهم كرامتى ولا مشاعرى المهم انك راجل البيت ..

يبقى يولع كل اللى فى البيت .. واولها انا .. انا .. ست البيت ..

...............

 (6)

نقره و نقره

والله دانا زى القمر .... اى نعم انا شعنونه حبتين .. وساعات نكديه .. وبقفل بسرعة

.. لكن اللى هيتجوزنى بقه .. امه دعياله .. دانا هاهننه واسعده واخليه ينسى الدنيا وما فيها .. بس والله العظيم والله العظيم لو طلع اولعبان ومبصبصاتى ..

يعنى عنيه زايغه .. والله لفقعهملوا وأطلع عليه عفاريتى .. وأخلى عشته هباب

فى هباب .. و لاخليه يعرف ينام ولا ياكل ولا يشرب .. واخليه يمشى مخيول يبص

وراه وقدامه .. لكن ده طبعاً .. ميمنعش انى رومانسيه وهاديااااا ووديعه خالص مالص

.. حكم إن ديه نقره وديه نقره .. و اياكم اياكم تنسو انى زى القمر .. وحبوبه خالص ..

مفيش حد ناوى يخطبنى بقى ..

............

(7)

سينا و اللئيمه

حبيبى.. ايه انت نسيت .. اه طالما ساكت كده يبقى شكلك نسيت ان النهارده عيد

تحرير سينا .. وطبعاً كالعادة هتسألنى وتقولى طب أعمل ايه يعنى ما سينا اتحررت خلاص.. لالا يا حبيبى الكلام ده مينفعش .. يعنى بالبلدى مياكلش عيش .. المفروض تجبلى هدية حلوة محندقة و تقولى كل سينا وانتى طيبه .. طبعاً هتقولى اشمعنه .. هقولك ببساطه مش سينا حررها الابطال و الابطال هما الرجالة و الرجالة روحهم المعنويه فى السما النهارده يعنى المفروض تعمل واجب معايا فى اليوم ده .. وبما انى عرفاك كويس طول عمرك صاحب واااااجب !! .. يبقى اقلها تعالج موقفك وتجبلى حتت اسوره البسها فى 

رقبتى.. وتقولي كل سينا وانت طيبة يااااااحبيتى وربنا لا يقطعلك عادة .. و يكتر حجتك كالعادة .

.................

(8)

عمران

خت ايه ياعمران من وابور الطحين.. مفيش غير الفقر ووجع الدماغ.. كل يوم من صبحية ربنا غطسان فى الزيت والقرف وكل يوم على الحال ده.. والوابور كل يوم بيكبر وبيتاخر وقرب يموت.. والعمدة مش همه غير الفلوس.. الفلوس وخلاص والمهيه اللى بيدهالى متكفيش حمار ..ولا حمار صغير حتي.. والوليه كل يوم طلباتها بتكتر عايزه فستان ياعمران.. عايزه احمر خدود ياعمران.. عايزه حتة صيغة ياعمران..

 وعمران مقدموش غير حاضر.. بس اجيب منين.. اجيب منين بس ياربي.. بس .. فيها ايه يعنى.. 

فيها ايه لو سرقت اه اسرق عشرتلاف جنيه.. اه عشرتلاف بس.. اشترى الوابور من العمده وابقى انا صاحب الوابور

.....................

(9)

عشرين سنه

انت جاى بتكلمنى فى ايه ، اللى فات ده مش أنت اللى حسيت بيه ، مش أنت اللى انجرحت ولا قسيت ولا بكيت ، يابنى اللى فات ده مش أيام و عدت ده عمر ضاع ، كنت فين أنت و أنا طفل 5 سنين شايف أبويا بيتقتل قدامى و أنا مش قادر أعمل حاجه ، عشرين سنه و أنا شايف دموع امى بتنزل قدامى و برضوا مش قادر أعملها حاجه ، و منظر موت أبويا بيتعرض قدامى  كل يوم.. وبشوفه زى ما أنا شايفك دلوقتى بظبط ، لحد ما جت اللحظة اللى مستنيها من عشرين سنه و اليوم اللى هرجع فيه و أخذ حق أبويا ب ايدي و حق امى اللى ماتت عشان معرفتش إجبلها الدواء ، عشرين سنه شايف العذاب و النوم على التراب مشوفتش طعم الراحه .. بتنقل من شغله ل شغله و من محل ل محل ، صاحب المحل ده كويس.. بس ده ابن كلب ، ماجربتش تمسح سلالم و هدومك كلها مبلوله و عندك برد طول الوقت ، ماجربتش تشتغل مكانيكى و يضربك 

ويشتمك كل يوم.. طبعا ماجربتش ، ماجربتش تبيع مناديل.. مناديل يا بيه ب نص جنيه يا بيه ، ماجربتش ،، و دلوقتى لما الدنيا أدتنى وشها و جه الوقت اللى مستنيه جاى تقولى سامح.. السماح دى كلمه معرفهاش ، مدرستهاش فى الشارع ، الدرس الوحيد اللى درسته هو أنى ازاى انتقم و أخذ حق أبويا ، هو ده اللى درسته و حفظته وهنفذه.. فاهم.. هنفذه !

..................

 (10)

ليه؟!

ليه.........؟؟؟

كل متأدم لبنت اهلها يرفضوني ليه.......؟

عشان اهلي ناس غلابه والفقر عايش معانا ؟؟؟

ولا عشان شغال في بنزينه وملقتش نصيبي في التعليم منا ابويا راجل غلبان ومعهوش

يصرف عليا...؟

ولا عشان الفقر قدري والهم نصيبي..؟

ليه..؟

بس انا مخترتش ان يكون الفقر قدري ومحدش يقدر يغير قدره....

منا جوعي كان كفران...؛:

مأدرتش اسرق.. لأ وطلع الي ميسرقش ممكن ينكتب عليه الموت....؟؟ليه......ليههههههه.....؟

سؤال جوبني عليه..؟؟

هو لأزم يكون ابويا بيه وأمي هانم عشان افتخر بيهم ...؟

لألألألأ ...؛؛

.......................

 (11)

رفدوني ليه

انا عارف هما رفدوني من الجرنال ليه..علشان يذلوني...عايزيني اركع علي ركبي...بس مش هيقدروا.. 

مش هيقدروا يكسروا القلم اللي فضل طول عمره يدافع عن الناس..القلم اللى عمره مازاود ولاهلل ولاطبل...القلم اللي خايف علي وطنه وحطه في حباب عنيه...واللي خايف علي ناسه لانهم اهله.. واللي خايف علي بكره لانه ملكه....حلمه...حلمه اللى عايش علشانه...صحيح هما قطعوا عني المرتب علشان يذلونى...ووقفوا في وشى في كل حته اروحها..لدرجه ان كل الناس رفضوا يشغلوني..لغايه ما

اضطروني ان اجي هنا.. انا بقالي يومين مكلتش .بس مش هشتغل غير بشروطي.. ومش بس كده..

الشغل اللي هيناسبنى كمان..انا لايمكن هخضع واستسلم...انا عارف ان الدايره بتضيق.. بس انا لسه واقف علي رجلي وماسك ارادتي بأيدي..ايوه..وهو ده الفرق بين الانسان والحيوان...انا لايمكن هستسلم..لايمكن..وعمري ماهسرق...لايمكن...لايمكن

....................

(12)

هـند

انا هند من اسره بسيطه عندي 3 اخوات اتعلمت لحد مااخدت ثانويه عامه.. وماكملتش علشان الظروف يعني علي قد الحال.. قلت اعمل حاجه.. اتعلمت ادي حقن للجيران بدل مايروحوا الصيدليه وأهو اللي بيطلع يعني يساعد ... بعدين فكرت في حاجه تانيه.. قلت دي مش جايبه همها .. اوقات كنت بشوف ابويا بيصلح الكهرباء او السباكه اتعلمت منه وبقيت اي حد من الجيران او المنطقة عنده حنفيه مكسوره او فيشه عايزه تتصلح اروح اصلحها ولقيت الموضوع كويس قصدي فلوسه كويسه والحال بدأ يتحسن ... بس المشكله ان جالي عرسان كتير وكل مايجي واحد يقول هو انا هاتجوز سباك او كهربائي يمشي ومايرجعش .. لحد ماجتلي عقده من الشغل ده بس اعمل ايه انا بساعد عيلتي ولازم اتحمل المسؤليه

..............

(13)

كفاية

كفاية.. كفاية ....انتوا.. انتوا الي اتطرتوني الجأ للعنف

ايوه .....عشان كنتوا فاكرين اني جبان .......لكن انا مش جبان علي فكرة

انتو لو مكنتوش خدعتوني من الاول ...... كان زماني دلوقتي بتعامل

معاكو بالحسني ...... لكن انتوا .....انتوا الي خلتوني ألجا للعنف

وازعق لكوا ...... انتو عيال مش متربية .. وانا الي هربيكو من هنا ورايح

وعلي فكرة بقي ...... بس اسكت اسكت خالص ....انا فيا مرار من جوة

ايوه.... انا الي هتكلم من هنا ورايح وانتو تقعدوا تسمعوني .... وعلي فكرة بقي

انا رايح اقابل ندي ......... يا جزمة انتا وهو .

.................

 (14)

صلاح

انا مريض ... وجاي . . . لا .. لا لا لا انا مش مريض انا زي الفل مين قال ان انا مريض . .  . . . صلاح . . اسمي صلاح . . مش مريض ها انا مش مريض . . . انا بس عندي مشكله . . . انا ... انا محدش بيحبني خالص . . كلهم بيكرهوني في الشارع في البيت في المدرسه . . حتى لما دخلت الجامعه كل زمايلي بيعاملوني وحش كأني اقل منهم . . انا فيا مشكله عشان يعاملوني كدا . . . تخيل يا دكتور لما بينادولي .. بيقولولي العبيييط . . . . . . . . . . .

انا انسان كويس في حياتي ومحترم . . حتى شوف هدومي نظيفه ومترتبه ازاي .. 

وكمان مجتهد في دراستي . . . ايييييوه .. ايوه اكييد هم بيكرهوني عشان كدا . . . دول مش بيكرهوني وبس دول بيحقدوا عليا كمان . . . . . . . . . .

بس انت عارف في كمان ناس غريبه بيبصولي كدا وبيعاملوني بطريقه بيخلوني احس اني بصعب عليهم . . . وان انا . . . . . مريض

ايه دا! .. انت بتبصلي كدا ليه . . بتبصلي كدا ليه . . . متبصليش كدا انا مش مريض . . انا كويس مش مريض . .انا مش مريض!!

.................

(15)

 الحرامي

عارف يا أستاذ إبراهيم أنا طول عمري حرامي

إية إنت مش مصدق ولا إيه؟؟؟!! طب إستنى إستنى..... إستنى يا عم صبرك بالله... شوف البطاقة كدة.

لاااااااااااا مش مكتوب فيها حرامي بس هما بيعرفوني من خلقتي كدة على طول..

أصل أنا شغال تباع على عربية نقل مع سواق بعيد عنك ررخم و إتم وطول النهار يناكف فيا,, 

يفضل يقولي ولااا نزل الأقفاص يالااا حمل الأقفاص دي يالا يالا يالا. وأنا طول النهار والليل أحمل في أقفاص الفاكهة.. إشي تفاح علي الكمترى على رومان على برتقان,,,, لا عندك عندك لتكون فاكر إن أنا متنغنغ في الفاكهة و لا حاجة دانا بحملها بس....

أنت عارف؟؟ أنا عندي أربع عيال صغيرين و الأربعة بيشتغلوا.. لا والأنأح من كده باخد منهم الفلوس اللي بيشتغلو بيها ..... يعني بدل ما أمد إيدي في جيبي و أديهم أنا اللي باخد منهم كان نفسي أدخلهم مدارس و أخليهم زي البني أدمين ... وولاد الناس المحترمين .... عشان كدة أنا عمري ماكنت بالقط إلا اللي يكفيني أنا و عيالي.. كده أبقى حرامي بردو يا أستاذ؟؟؟؟؟؟؟

أبقى حرامي و ربنا حايحسبني؟؟؟؟؟؟؟!!!!!!!!!!

لا يا أستاذ إبراهيم ,, ربنا عادل أوي و ما يرداش بالظلم, ومايردوش أنا أبات يوم جعان أنا و عيالي

ربنا عارف أنا مش باخد طمع, ربنا عارف إني باخد عشان أنيم العيال شبعانة.. العيال كل يوم بتنام بتطقطع من كل الجوع,,,, أكيد ربنا حيسامحني مش كدة يا أستاذ؟؟؟؟؟؟؟؟؟؟؟؟؟

(16)

البارمان

 زمــان قبل العنكبوت ما ينسج خيوطه على باب الغار .. وقبل الصليب ما يندق .. قبل البحر ما ينشق والعصايا تبقى افعى .. قبل الحوت وبيع الضفاير واختراع الصبر .. قبل الخاتم المسحور ونبأ الهدهد وحتى قبل الطوفان .. كان فى غرابين سود , واحد قتل التانى ونبش فى التراب .. عشان يحـفر اول حـفـرة عرفتها الأرض.. مش عشان يزرع بذرة ولا يجيب ميه لا .. اول حفرة عشان تتروى بالدم . ومن وقتها والنبش شغاال على ودنه .. والحفرة عمالة توسع . والغراب واقف جنبها بينعق بصوت عالى , متعرفش اذا كان فرحان باللى عمله ولا بيعيط على اخوه .. على كل حال الحفرة اللى اتحفرت مانسدتش تانى ابدا . وكل يوم بيفوت بتوسع الدايرة زيادة .. وانا ... انا بشرب ،، تشرب !! فى صحتك........................

……………….

(17)

#عباس_الأبيض_في_اليوم_الأسود| 2004 

بتعيط يا محمود ! خلاص الدنيا اسودت في عينيك .. مفيش أمل في الحياة ؟

طبعا مش متخيل انك هتقدر تنساها في يوم من الأيام ..

يابني يا حبيبي انت مش أول واحد تحب في الدنيا دي ، ناس كتير غيرك حبوا واتعذبوا زيك كده .. ونسيوا !

الزمن يا محمود أكبر نساي .. وساعات الزمن يحب يصلح غلطته بنفسه ويقدم البديل وقد يكون البديل أفضل

تحب اقولك الوصفة العجيبة لنسيان الحبيب..

انك تحب.. أيوة !!

'' ودَاوني بالّتي كانَتْ هيَ الدّاءُ. "

مش مهم تحب واحدة تانية .. حب حاجة تانية ! حب شغلك مثلا

المهم النار اللي جواك دي تمسك في حاجة تانية ..

يا محمود أنا عايز أقولك على حاجة يمكن ماتحبش تصدقني دلوقتي بس بعدين هتقول بابا قال..

سلوى دي مابتحبكش ! ولا عمرها حبيتك، مفيش واحدة بتحب واحد بجد وتقبل تتجوز واحد تاني يابني ..

اللي ميحبناش مايستاهلش دمعة من عنينا دي!

.......

(18)

ابناء ولكن

احنا بنكبر يا صالح 

انا صحيح الناس بتعملي حساب هنا وفي الشركة 

بس ده كله علشان واقف علي رجلي وبصحتي 

انما لو وقعت الكل هيتقلب عليا 

وجايز اوووي ملقيش اللي يبص في وشي او حتي يناولني كباية مايه 

هي دي الدنيا 

الدنيا معاك تبقي الناس حواليك وتحت رجليك 

وقعت ومبقتش قادر لا تنفعهم او تتضرهم..  يدوسوك في سكتهم